A experiencia adquirida no desenvolvemento do Proxecto Mandeo puxo de manifesto a necesidade de atopar ferramentas que, desde a acción máis próxima aos cidadáns, a dos municipios, integren as políticas ou estratexias de maior escala espacial, máis territoriais. A Axenda 21 Local (AG21L) pode converterse nesa ferramenta.

A Axenda 21 Local é o elemento máis amplamente difundido e aceptado por parte das autoridades locais para abordar os problemas ambientais desde o enfoque de «pensar globalmente e actuar localmente».

É, en esencia, un proceso participativo e multisectorial para alcanzar as metas da Axenda 21 (un dos principais resultados do Cumio da Terra de Río 92) a nivel local a través da preparación e implementación dun plan estratéxico a longo prazo que dirixa os asuntos locais prioritarios de desenvolvemento sustentable.